January 03, 2010

打神 - 苏春梅



The following is from 李池湘's blog ...

好多人都问我,做戏要乜嘢条件架?我话做戏要声、色、艺齐全,声排第一,系最紧要嘅,俗语有话“先声夺人”,“一声压三丑”,可见声嘅重要。

苏春梅天生声靓,嗓音甜润,清脆中带明亮,高低音、真假音都结合得巧妙自然。

佢唱嘅 "红腔" 十分出色,聪明嘅佢善于抓住最关键段落,运用精细独特嘅长腔,唱出嚟就显得韵味特别浓郁。好似唱 《打神》 呢首被广为传唱,脍炙人口嘅名曲,苏春梅就唱得好靓嘞。

“ 当日神前一柱香两家设誓言,他说到老两不相分我说黃泉情未了,他说中途若负阿娇,天地也难饶,我说信难饶。” 呢段唱系焦桂英对以前嘅回忆,想起两人曾经喺海神面前盟誓,永不负心。佢唱得好平静,哀婉动人,轻轻提气将声带出嚟,音色清亮。

到最后嘅一句:“ 焦桂英倒在海神庙,哭他个海沸山摇!” 苏春梅喺呢句唱腔入边,充分噉运用咗红腔以情带声嘅演唱特点,用饱含住怨恨嘅情绪拉咗一个长高腔,只见佢气沉丹田力贯头顶,唱出嘅声好有穿透力,好似吹箫噉响彻云霄,宣泄咗焦桂英对王魁负义忘情嘅悲愤心情,唱出咗红腔嘅神韵,令人陶醉。